28 апрельыште С. Г. Чавайн лӱмеш калыкле книгагудышто «Марий краевед» клубын черетан, 143-шо погынымашыже лийын. Вашлиймаш Марий краевед обществын 100 ияш лӱмгечыжлан да Марий талешке кечылан пӧлеклалтын.
Погынымашым клубын председательже Алексей Максимович Клёнов почын. Уна-влак деке саламлыме мут дене педагогике пашан ветеранже, краевед Дина Михайловна Рычкова лектын. Тудо патриотизм шӱлышан книгаже-влакым ончыктен. Нуно лӱмын эртарыме сар операцийын участникше да волонтёр-влак нерген каласкалат, тыгак книгалашке боевой шӱлышым нӧлтышӧ почеламут ден ойлымаш-влакым пуртымо.
Марий краевед обществын историйже да пашаж нерген тӱҥ докладым краевед, Марий Эл Республикысе тӱвыран сулло пашаеҥже Ольга Анатольевна Требушкова лудын. Тудо архив материал-влакым келгын лончылен, обществылан пӧлеклалтше книгам лукташ ямдыла. Краеведений пӧлкам вуйлатыше Светлана Евгеньевна Сауляк книгагудын савыктыме пашаж дене палдарен: «Марий Эл, время, события, люди» календарьын ойыртемже да кӱлешлыкше нерген каласкален.
Историй науко кандидат Сергей Константинович Свечников краевед-историк-влакын шочмо кундемым шымлымаште да вияҥдымаште надырыштым кӱкшын аклен. Клубын погынымашыштыже Марий краеведений обществын пашажын кӱлешлыкшым палемден коденыт. Обществын пашажым 1930 ий январьыште икымше Марий областной конференцийыште иктешлыме. Лач тунам Марий шанче шымлыше институтым (кызыт –В.М. Васильев лӱмеш йылмым, сылнымутым да эртыкым шанчын шымлыше марий интситут) почмо нерген пунчалым лукмо. Чаманен каласыман, 1931 ийыште краеведений толкын йӧршын пытен, да Марий краеведений обществе паша ыштымым чарнен. Туге гынат, обществылан негызым пыштыше тале шанчызе ден шымлызе-влакын лӱмышт курымешлан кодын: тиде М. Н. Янтемир, Ф. Е. Егоров, Т. Е. Евсеев, В. А. Мухин, В. М. Васильев да молат. Нунын пашашт ончыкылык тукымлан пеҥгыде негызым пыштеныт, шочмо кундемым йӧраташ да тудым шымлаш таратен шогат.
«Марий краевед» клубын участникше-влаклан пашам чолган ыштымыштлан тауштена! Пеҥгыде тазалыкым да у творческий сеҥымашым тыланена! У вашлиймаш марте!
