Шергакан йолташ-влак, ме таче тендам «Агытан сар» модыш дене палдарена.
Модшо-влак кок агытанын вашла кредалмыштым ончыктат. Тыгодым ик кидышт дене йолыштым шеҥгекыла кучат да, пел йол ӱмбалне тӧрштылын, вачышт дене икте-весыштым шӱкедылыт. Кӧ «тушман агытаным», чот тӱкен, кок йол ӱмбаке шогалта, тудо сеҥышыш лектеш.
Тиде модыш кок тӱшка дене модмо годым утларак мыскара койышан лектеш, тунам утларак сеҥаш тыршат. Модшо-влак шке гайрак кужытан, шке гайрак виян еҥым ойырен налыт да ваш-ваш шогалыт. Ик велже – ик тӱшка, вес велже – вес тӱшка. Сигнал почеш кажныже йолжым, шеҥгек тодылын, кидше дене кучен шогалеш. «Агытан-влак, сӧйыш!» манын кычкыралмеке, мужыр-влак ваш-ваш шӱкедылаш тӱҥалыт. Кӧ кок йол ӱмбаке шогалеш, тудо сеҥалтшылан шотлалтеш. Сеҥышыжат модыш гыч кораҥеш. Тыге кок тӱшка гыч вашлийше кажне мужыр шке «саржым» эртара. Кудо команде шуко очком пога, тудо сеҥышыш лектеш. Тыгак кӧ вес «агытаным» оҥго гыч шӱкен луктеш, сеҥа.
Модса йолташда-влак дене, ешда дене пырля модса!
Источник фото: https://detsad17.rchuv.ru/news/2022/04/21/denj-chuvashskih-igr-igri-batira
Вниманию читателей представляем список литературы по представленной теме из фонда Национальной библиотеки имени С. Г. Чавайна:
- Китиков, А. Е. Марий калык модыш / А. Е. Китиков. – Йошкар-Ола, 1990. – 60 с.
- Марий калык модыш-влак = [Марийские народные игры] / С. Д. Архипова ямдылен. – Йошкар-Ола, 2012. – 111 с.
- Марий калык ойпого : хрестоматий / В. Т. Михайлов ямд. – Йошкар-Ола, 2011. – 358 с.
- Марийские народные игры / составитель Архипова Светлана Дмитриевна. – Йошкар-Ола, 2020. – 119 с. : ил.
- Михайлов, В. Т. Марий калык ойпого = [Устное народное творчество мари] : туныктымо пособий = [учебное пособие] / В. Т. Михайлов. – Йошкар-Ола, 2012. – 310 с.
- Петухова А. Н. Детский фольклор народа мари / А. Н. Петухова. – Йошкар-Ола, 2004. – 288 с.
Материал подготовила Миниахметова Л. И., ведущий библиотекарь отдела социально-экономической литературы
