У ий – тиде вучымо, йӧратыме пайрем! С. Г. Чавайн лӱмеш книгагудышто тиде пайремлан пӧлеклалтше «Весела У ий» лӱман интерактивный модышым ямдылыме. 22 декабрьыште Йошкар-Оласе 2-шо номеран школын икымше классыште тунемшыже-влак тиде модышышко кумылын ушненыт. Тӱрлӧ костюман, весела кумылан йоча-влак тиде пайремыште йомакысе мотор марий ӱдыр Пампалче дене палыме лийыныт, Вуверкува дене марий модыш дене модыныт, рывыж да мераҥ дене туштым туштеныт, марла кушташ тунемыныт, Йӱштӧ Кугыза да Лумӱдырлан почеламутым каласкаленыт, У ий кож йыр пӧрдын мурым муреныт.
У ий пайрем кумыл чыланыштым авалтен, сай шонымашым, поро кумылым коден.
Шушаш У ий дене ме уло кумылын саламлена да «Весела У ий» модышыш ушнаш пагален ӱжына!
