Пеледыш тылзын 20 кечынже Йошкар-Олаште марий калык ик эн йӧратыме пайремжым – Пеледыш пайремым палемден. С. Г. Чавайн лӱмеш калыкле книгагудо тений тушко икымше гана ушнен. Марий паркыште уна-шамыч оҥай викторине, мастар-класс, модыш-влакыште шке вийыштым тергеныт, республикын картыжым чумыреныт, марий калыкын поян ойпогыжо дене палыме лийыныт. Тыгак нуным оҥай фотозоно-влак: «Сергей Чавайн», марий тӱр дене сӧрастарыме окна, «Пампалче» ден «Чумбылат» тантамареске – вученыт.
Пеледыш пайрем – марий калыкын куанле, волгыдо пайремже. Тушко Российысе вес регионла гыч, республикысе районла гыч толшо тӱрлӧ калык ушнен, марий калыкын йӱлажым, куатшым аклен. С. Г. Чавайн лӱмеш калыкле книгагудын «Марий книга сандалык» площадкыш ушнышо-влаклан кугу таум ойлена, вес ийынат Пеледыш пайремыште кумылын вучаш тӱҥалына!
