12 февральыште С. Г. Чавайн лӱмеш калыкле книгагудын конференц-залыштыже «Марий краевед» клубын черетан погынымашыже лийын. Вашлиймаш кумдан палыме учёный-историк Сергей Валентинович Стариковын 70 ияш лӱмгечыжлан пӧлеклалтын.
Стариков Сергей Валентинович – историй науко доктор, Марий кугыжаныш университетын профессоржо, Марий Эл Республикысе шанчын сулло пашаеҥже, Россий Федерацийысе кӱшыл профессионал образованийын почётан пашаеҥже, Йошкар-Олан почётан гражданинже. Сергей Валентинович шуко ий С. Г. Чавайн лӱмеш калыкле книгагудо дене пеҥгыде кылым куча, «Марий краевед» клубын поро йолташыже.
Тудын пашаже-влак «Марий Элын идалыкысе книгаже» республикысе конкурсын тӱрлӧ номинацийыштыже ик гана веле огыл сеҥышыш лектыныт:
1. «Идалыкын эн сай книгаже»: «Царевококшайский альбом: эпоха, город и горожане на старинных открытках и фотографиях» (2010);
2. «Зритель-влакын призышт»: «Александр Котомкин (Савинский): жизнь, творчество, судьба» (2012);
3. «Марий Эл Республик нерген эн сай книга»: «Йошкар-Ола – Красный город России» (фотоальбом) (2018);
4. «Марий Элын лӱмлӧ еҥже-влак нерген эн сай книга»: «Русские писатели Алексей Луговой и Владимир Тихонов (историко-литературные очерки о знаменитых царевококшайцах)» (2022).
«Марий краевед» клубын погынымашышкыже Сергей Валентиновичын коллегыже, йолташыже, аспирантше да студентше-влак ушненыт. Учёный-историк, марий кугыжаныш университетын профессоржо Ананий Герасимович Иванов коллегыжын илышыже да паша корныж нерген радамын каласкален. Юбилярым филологий науко кандидат Олег Арсентьевич Сергеев, «Марий краевед» клубын председательже Алексей Максимович Кленов, литературовед Николай Иванович Куторов шокшын саламленыт.
С. Г. Чавайн лӱмеш калыкле книгагудын коллективше Стариков Сергей Валентиновичым лӱмгечыж дене шокшын саламла! Тыланена пеҥгыде тазалыкым, кужу ӱмырым, пашаште у кӱкшытым! Эреак умылымаш, пагалымаш да чон ласкалык лийже!
