24 сентябрьыште С.Г. Чавайн лӱмеш калыкле книгагудышто «Марий краевед» клубын черетан погынымашыже эртен. Тудо кумдан палыме журналист, историй науко кандидат, доцент да РСФСР культурын сулло пашаеҥже Михаил Тихонович Сергеевын 100 ияш лӱмгечыжлан пӧлеклалтын.
Вашлиймаш тӱҥалтыште йӱла почеш краеведений тӱняште эртыше тӱҥ событий-влакым палемдыме. Краеведений пӧлкам вуйлатыше Светлана Евгеньевна Сауляк у книга-влак дене палдарен. 
Клуб вуйлатыше Алексей Максимович Клёнов М. Т. Сергеевын илыш корныж нерген каласкален, шанчыеҥын марий кундемын историйжым шымлымаште кугу надыржым палемден. Мероприятийыште Михаил Сергеевын йолташыже, коллегыже да родо-тукымжо лийыныт. Йоча ден самырык-влакын усталык полатын ешартыш шинчымашым пуышо педагогшо Елена Ивановна Логинова «Михаил Тихонович Сергеевын илыш корныжо» проект нерген каласкален, тукымвожым шымлыме лектышыж дене палдарен.
Вашлиймашыште Михаил Тихонович Сергеев нерген шуко поро шомак йоҥген. Коллеге да йолташ нерген шарнымашым краевед Иван Аркадьевич Андреев, журналист Борис Алексеевич Шамиев, Коркатово лицейын туныктышыжо Валерий Александрович Подбойкин, сӱретче Иван Михайлович Ямбердов да библиотековед Татьяна Анатольевна Петрова ойленыт. Педагогический пашан ветеранже Людмила Николаевна Никифорова Волжский районысо Кугу Карамас школышто учёныйлан мемориал оҥам почмо нерген каласкален. Михаил Тихонович нерген шокшо шарнымашым шӱжарже Тамара Тихоновна Соловьёва (Сергеева) ойлен. 
Тудо изажын йоча да самырык годсо фотографий, серыш да книгаже-влакым переген арала.
Шарнымаш касым М. Шкетан лӱмеш Марий кугыжаныш драме театрын артисткыже Елена Мочалова сӧрастарен. Тудо шочмо мланде нерген почеламутым да Михаил Тихонович Сергеевын книгашкыже пурышо сар жапыште возымо серыш-влакым йоҥгалтарен.
Вашлиймаш шокшо да поро кумыл дене эртен. Михаил Тихонович Сергеев калыклан кугу поянлыкым коден: тудын марий кундемым шымлыме пашаже да книгаже-влак кызытат йодмашан улыт.
«Марий краевед» клубыш погынышо-влаклан тауштена! Вес вашлиймаш декабрь тылзыште лиеш, ушныза да лийза мемнан дене пырля!
