Шергакан йолташ-влак, ме таче тендам «Йӱд, шӱдыр-влак, кече, кечыйол-влак» лӱман модыш дене палдарена.
«Кече» ден «йӱд» йоча-влак кокла гыч ойыралтыт. Тидым шотлеммутын полшымыж дене ыштат. Вӱдышым чылан ойырат. А вара вӱдышӧ «кечым» шотлен луктеш:
– Икыт, кокыт, кумыт, нылыт,
Визыт, кудыт, шымыт,
Кандаш, индеш, лу,
Чевер кече, лек!
Вара вӱдышӧ «йӱдым» шотлен луктеш.
– Икыт, кокыт, кумыт, нылыт,
Визыт, кудыт, шымыт,
Кандаш, индеш, лу,
Пычкемыш йӱд, лек!
Тыге «йӱд» ден «кече» ваштарешла шогалыт да шке тӱшкаштым чумырат. Кече – «кечыйол-влакым» пога. Йӱд – «шӱдыр-влакым» кычал муэда.
Вӱдышӧ йоча-влакым оҥгыш шогалта да манеш:
– Кечыйол ден шӱдыр-влак, те лугалт пытенда, но тендам «кече» ден «йӱд» ойыраш тӱҥалыт. Кечывалым те чыланат юарледа, а йӱдым шып лийыда. Кӧ тарвана, тудым йӱд наҥгая.
– Кечывал!
Чылан юарлат, тӧрштылыт, куржталыт. Кечат пырля тӧрштылеш.
– Йӱд!
Чыланат шыпланат, огыт тарване, пуйто мален колтат. Йӱд толеш. Тудо тарванылше да воштыл колтышо йочам пеленже наҥгая.
Вӱдышӧ икмыняр гана жап вашталтмым увертара. Йӱд шке шӱдыр-влакшым пога, оҥгышто кодшо икшыве-влак кечыйоллан шотлалтыт. Кунам кок кашакыштат йоча-влак иктӧр лийыт, «Кудо тӱшка талырак?» манын, ӱчашен налыт. Тыгодым куржталмаште да кок могыр гыч кандырам шупшмаште ӱнарым тергаш лиеш.
Модса йолташда-влак дене, ешда дене пырля модса!
